2008年4月26日星期六

公司大地震

去完香港返黎...公司好似完全唔同左喇
4月第一個星期, 公司就炒左750人. 半間公司既人俾人laid off..
真係唔知幾知到自己...如果真係到我既話,我又會點?我何去何從..我既選擇係咩呢?
最近真係好係好大壓力, 返到公司, 個個人都無笑容, 大部分人都好安靜甘做自己既野.
自己最近好容易就喊.....或者真係壓力太大卦
我真係唔知公司既地震震完未...希望公司可以好快甘穩定喇

2008年4月6日星期日

香港行 2008

今年既香港之旅都係得兩個星期
好匆忙既一個旅程. 要去香港, 澳門同大陸
特別之處係我男友仔同我一齊返...
26歲既生日係香港渡過
真係好開心...好多年都無係香港過生日嚕
感謝所有陪我一齊去玩既朋友仔.
感覺真係好好, 無論大家相隔幾遠. 見到面就好親切, 大家好似無分開過
今次俾人問得最多既問題係.
你幾時會結婚??
哈哈哈....一定唔會係2008既事
沙沙話, 佢10個小學中學有9個結左婚, 但中學同學就好似無
我覺得讀女子中學既, 對自己既能力有一定既信心, 唔認為自己既能力比男仔差, 又唔駛依賴任何人.
點解要甘早結婚啵!
最喜歡文文既妙論... 係必需品定奢侈品
除左錢. 親情, 友情係必需品外,
其他都係奢侈品, 無左係會傷心, 但唔會生活唔到架.
只會說句: 擁有時, 惜之
當然曾經有恨嫁過, 有幻想過自己既婚禮
不過, 現實中, 仍然存有好多未解決既問題
現只擁有一張長期飯票既期票. 兌現既時候會再作另行通知!!!
講返香港行:
一年無見我既契仔hei hei, 今次見佢又大個仔左.好鬼死可愛...最鍾意推車車, 好掛住佢
而契細佬ethan..非常之重...不過好乖仔.只可以抱一陣, 唔係手都軟. (p.s 6個月大既巨b, 重25磅)
係香港都係忙住見朋友, 買野同食野!
去左澳門, 威尼斯人酒店真係唔錯,間酒店房又大又舒服.
不過都貢獻左幾百蚊...
又去左大陸...主要都係食, 食同食
今次既旅程, 非常之忙.又累.
好多野都無時間去做, 好多朋友都見唔到
唯有下次囉.
成日都有下次架喇.....
朋友們, 2009 年香港再聚